పతంజలిమహర్షి కృత నటేశ్వరాష్టకం

ఆనందనృత్త సమయే నట నాయకస్య
పాదారవింద మణి నూపుర సంచితాని
ఆనందయంతి మదయంతి విమోహయంతి
రోమాంచయంతి నయనాని కృతార్థయంతి

సదంచిత ముదంచిత నికుంచితపదం ఝలఝలంచలిత మంజుకటకం
పతంజలి దృగంజన మనంజన మచంచల పదం జనన భంజనకరం
కదంబరుచిమంబర వసం పరమమంబుద కదంబక విడంబక గలం
చిదంబుదమణిం బుధహృదంబుజ రవిం పర చిదంబరనటం హృది భజ         1

హరం త్రిపురభంజన మనంత కృత కంకణ మఖండదయ మంత రహితం
విరించి సుర సంహతి నిరంతర  విచింతిత పదం తరుణ చంద్ర మకుటం
పరంపద విఖండిత యమం భసిత మండిత తనుం మదన వంచన పరం
చిరంతనమముం ప్రణత సంచిత నిధిం పర చిదంబరనటం హృది భజ            2

అవంతమఖిలం జగదభంగగుణ తుంగమమతం ధృతవిధుంసుర సరిత్
తరంగ నికురంబధృతి లంపటజటం శమనడంబరహరం భవహరం
శివం దశదిగంతర విజృంభితకరం కరలసన్మృగ శిశుం పశుపతిం
హరం శశి ధనంజయ పతంగ నయనం పర చిదంబర నటం హృది భజ              3

అనంత నవరత్న విలసత్కటకకింకిణి ఝలం ఝలఝలం ఝలరవం
ముకుంద విధిహస్తగత మద్దలలయ ధ్వని ధిమిద్ధిమిత నర్తన పదం
శకుంత రథ బర్హిరథ దంతిముఖ నందిగణ భృంగిరిటి సంఘనికటం
సనంద సనక ప్రముఖ వందిత పదం పర చిందంబర నటం హృది భజ            4

అనంత మహిమం త్రిదశవంద్య చరణం మునిహృదంతర వసంతమమలం
కబంధ వియదింద్వవని గంధవహ వహ్నిమఖబంధు రవిమంజువపుషం
అనంత విభవం త్రిజగదంతరమణిం త్రినయనం త్రిపురఖండనపరం
సనందముని వందితపదం సకరుణం పర చిదంబర నటం హృది భజ              5

అచింత్యమళిబృంద రుచిబంధుర గళస్ఫురిత కుందనికురంబధవళం
ముకుంద బలహంతృసురబృంద కృతవందన లసంతమహి కుండల ధరం
అకంప మనుకంపితరతిం సుజన మంగళ నిధిం గజహరం పశుపతిం
ధనంజయనుతం ప్రణత రంజన పరం పర చిదంబర నటం హృది భజ             6

పరం సురవరం పురహరం పశుపతిం జనిత దంతిముఖ షణ్ముఖ మముం
మృడం కనకపింగళ జటం సనక పంకజ రవిం సుమనసం హిమరుచిం
అసంగ మనసం జలధి జన్మ గరళం కబలయంత మతులం గుణనిధిం
సమస్త వరదం శమితమిందు వదనం పరచిదంబర నటం హృది భజ              7

అజం క్షితిరథం భుజగపుంగవ గుణం కనక శృంగి ధనుషం కరలసత్
కురంగ పృథు టంకపరశుం రుచిరకుంకుమ రుచిం డమరుకంచ దధతం
ముకుంద విశిఖం నమదవంద్య ఫలదం నిగమబృంద తురగం నిరుపమం
సచండికమముం ఝటితి సంహృతపురం పర చిదంబర నటం హృది భజ      8

అనంగ పరిపంథినమజం క్షితిధురంధరమలం కరుణయంతమఖిలం
జ్వలంతమనలం దధతమంధకరిపుం సతతమింద్ర సుర వందిత పదం
ఉదంచదరవిందకుల బంధు శత బింబ రుచి సంహతి సుగంధి వపుషం
పతంజలినుతం ప్రణవపంజర శుకం పరచిదంబర నటం హృదిభజ              9

ఇతి స్తవమముం భుజగపుంగవకృతం ప్రతిదినం పఠతి యః కృతముఖః
సదః ప్రభుపద ద్వితయ దర్శన పదం సులలితం చరణ శృంగ రహితం
సరః ప్రభవ సంభవ హరిత్పతిహరి ప్రముఖ దివ్యనుత శంకరపదం
స గచ్ఛతిపరం న తు జనుర్జలనిధిం పరమ దుఃఖ జనకం దురితదం               10